Ábyrgar konur og sjúkir karlar. Birtingarmyndir nauðgunarmenningar í íslensku samfélagi

Abstract

Á undanförum mánuðum og árum hefur átt sér stað vitundarvakning varðandi nauðganir og annað kynferðislegt ofbeldi. Markmið þessarar rannsóknar sem hér er rædd er að varpa ljósi á birtingarmyndir nauðgunarmenningar á Íslandi, og þá sérstaklega hvaða hugmyndir eru ríkjandi meðal ungs fólks um nauðganir, þolendur og gerendur. Auk þess er sjónum beint að því hvaða áhrif þessar hugmyndir hafa á brotaþola nauðgana. Rannsóknin byggir á rýnihópaviðtölum við háskólanema á höfuðborgarsvæðinu og hálf-stöðluðum viðtölum við háskólanema, brotaþola nauðgana og sérfræðing sem starfar náið með brotaþolum. Niðurstöður rannsóknarinnar varpa ljósi á nauðgunarmenningu hér á landi, hvernig nauðganir og annað
kynferðislegt ofbeldi er normalíserað og hvernig orðræðan eða ríkjandi hugmyndir um nauðganir fjalla einkum um að nauðgun er dregin í efa, brotaþolum er kennt um nauðganirnar, og leitað er leiða til að afsaka gjörðir gerenda.