„Hann er bara á vondum stað“. Reimleikahús í Rökkri eftir Erling Óttar Thoroddsen

Abstract

Reimleikahús eru ýmist skrímsli eða hýsa þau, nema hvort tveggja sé. Þau hafa einstakt aðdráttarafl og kunna að krækja í fórnarlömb eftir ýmsum leiðum. Óhugnanlegasta reimleikahúsið í kvikmyndinni Rökkri eftir Erling Óttar Thoroddsen (2017)
veitir hvorki skjól gegn veðri né vindum því það er ekki úr timbri, steypu eða steini. Draugarnir í Rökkri hanga nefnilega á netinu. Erlingur beinir sjónum sérstaklega að þeim hættum sem kunna að steðja að ungum hommum á forsendum hrollvekjugreinarinnar. Spjallrásir og samfélagsmiðlar orka eins og veiðitæki fyrir skrímslin í kvikmyndinni, sem sitja þar fyrir aðalpersónum hennar. Þögn þolenda í kjölfar kynferðisbrota er gerð að umræðuefni í kvikmynd Erlings en rannsóknir benda til þess að karlar tilkynni síður um kynferðisofbeldi sem þeir verða fyrir en konur.